Kestell rugby klub het die 2011 seisoen volstoom en vol moed begin. Die spelers het op hulle goeie vertoning van die vorige jaar gebou en goeie rugby gespeel.

In die 2011 seisoen is min wedstryde gespeel a.g.v. spanne wat onttrek het, maar dit het nie die spelpyl van die span beïnvloed nie. Die span het in die tweede divisie gespeel en onoorwonne na die finaal deurgedring waar hulle met ‘n gedugte Collegians 2 span moes swaarde gekruis. Kestell het na ‘n harde stryd die wedstryd 26 -18 gewen en so die kampioene van die Stoney Steenkamp liga geword.

                                    Drie gelukkige spelers na die gewonne finaal!

Die spelers het tot hulle volle potensiaal gepresteer en nog meer gegee as wat van hulle verwag was. Die bestuur van 2012 gaan hul beywer om alles in hul vermoë te doen om die pad wat in 2011 begin is verder te vat. Ons wil 2012 so maklik as moontlik vir die spelers maak sodat hulle nie net weer Kestell trots maak nie, maar ook self, die spel rugby, sal geniet soos dit geniet moet word.

Die grootste uitdagings vir die bestuur is om genoeg fondse intesamel vir 2021. Kestell rugby is die kombinasie van meer as een dorp se spelers. Die klub word gevoed deur Kestell dorp spelers, asook Harrismith, Bethlehem en spelers van Qwa-Qwa. Meeste van die spelers kan nie hul eie vervoer bekostig nie omdat ons ‘n klub is met baie ontwikkelende spelers (nie-blanke spelers) en daarom beoog die bestuur om petrol geld asook taxi’s vir die spelers beskikbaar te stel om die oefeninge en wedstryde by te woon.

Indien enige hulp verleen wil word of enige speler belang stel om vir Kestell te kom speel kan U gerus enige van die bestuurslede kontak. Ons wil 2012 weer ‘n groot jaar maak vir Kestell Rugby.